ဝေ့ဝဲ ဝိညာဉ်
(၁)
မှိုင်းပျပျ ကောင်းကင်ကြီးအောက်မှာရပ်ကာ မျက်စိတဆုံးမြင်နေရတဲ့ ကွင်းပြင်ကျယ်ကြီးကို လာလာလို့ ငေးငေးကြည့်နေ တတ်တာ ကြာခဲ့ပြီ။ အကြိမ်ဘယ်လောက်ဆိုတာကိုပင် မရေတွက်နိုင်တဲ့အထိ။ ကျယ်ပြန့်ခြင်းနောက်ကွယ်မှာ ပုန်း လျိုးနေတဲ့ လွတ်လပ် ခြင်းရသကို အပြည့်အဝပေးနိုင်တဲ့ ဒီနေရာလေးက ကိုယ့်ကို သူ့ဆီ မကြာမကြာ မလာပဲ မနေနိုင်အောင် ညှို့ ငင်နိုင်ခဲ့တယ်။ တိတ်ဆိတ် မှုတွေ၊ လွတ်လပ်မှုတွေ၊ စိမ်းလန်းမှုတွေ၊ ငြိမ်းချမ်းမှုတွေကို တပြိုင်တည်း ပေးစွမ်းနိုင်တဲ့ ဒီနေရာ လေးဟာ ကိုယ့်အဖို့ ထာဝရ မဟုတ် ပေမယ့် တဒင်္ဂနိဗ္ဗာန်ဘုံလေးတစ်ခုကိုတော့ လှပစွာ ဖန်တီးပေးထားနိုင်တယ်။ နှောင့်ယှက် သူမရှိ၊ ကန့်ကွက်သူမရှိ၊ ခြိမ်းခြောက်မည့်သူ လည်း မရှိ။ ပကတိ ငြိမ်းအေးမှုတွေနဲ့ လွှမ်းခြုံထားတဲ့ ဒီနေရာလေးမှာ ကိုယ့်ကို အနှောက်အယှက်ပေးတတ်တာဆိုလို့ မွမွလေးတိုက် ခတ်လာတတ်တဲ့ လေနုအေးလေးများသာပဲဖြစ်တယ်။ သူတို့ကတော့ ကိုယ့်အတွက် တခါခါမှာ မိတ်ဆွေဖြစ်တတ်သလို တခါခါမှာတော့ လည်း ရန်သူဆိုးလေးတွေပါပဲ။
ရေခဲလုနီးပါး အေးမြတတ်တဲ့ ဆောင်းညများမှာဆို သူတို့က ကိုယ့်အတွက် ရန်သူတွေပေါ့။ ဒါပေမယ့် အပူရှိန် အလွန် မပြင်း ပေမယ့် နေမင်းရဲ့ကျီစယ်မှုက နည်းနည်းလေးကြမ်းသလိုဖြစ်တတ်တဲ့ ဇူလိုင် သြဂုတ်လို နွေရာသီမှာတော့ လေနုလေးတွေကပဲ ကိုယ့် မိတ်ဆွေကောင်းလေးတွေ ဖြစ်သွားပြန်တယ်။ အထူးသဖြင့် နွေလရဲ့ ညဦးအချိန်များမှာ လရောင်ပျပျအောက် စိတ်နောက်ကိုယ်ပါ ဒီနေ ရာလေးကို ရောက်ရောက်လာတတ်တဲ့ ကိုယ့်အတွက် အေးမြမြ ဒီလေနုလေးတွေရဲ့ တွေ့ထိရသက ဘယ် လိုမှ မေ့ပျောက်လို့ မရနိုင် လောက်အောင်ပဲ လွန်စွာ သိမ်မွေ့ရင်ခုန်စရာ ကောင်းနိုင်လွန်းလှပါတယ်။ လနဲ့ညရဲ့ အချိုးကျစွာ ပဏာရနေမှုမှာ နုနုမွမွ ဖွတရလေး ဆော့ကစားတတ်တဲ့ လေနုလေးသာ မပါဝင်နိုင်ခဲ့ရင် ညဆိုတာ စွဲလမ်းတပ်မက်စရာ အရာ တစ်ခုမှ ဟုတ်နိုင်ပါ့မလားလို့ပင် တွေးထင်မိ ခဲ့ဘူးတယ်။ ဒါဖြင့်ရင် ဒီနေရာလေးရဲ့အလှက ညမှလားကွယ်ဆိုတော့။ ဘယ်ဟုတ်လိမ့်မလဲ။
ကြည့်လိုက်ပါ့လား။ ကိုယ့်ခေါင်းပေါ်က ကောင်းကင်ကြီး။ မိုးတိမ်တွေ ထူထူထဲထဲ။ နေရဲ့အလင်းသည်ပင် တိမ်လွှာပြင်ကို မတိုးလျှိုးနိုင်တဲ့အထိ။ ဒါကို မိုးညို့ နေတယ်လို့ ပြောရိုးမဟုတ်လား။ ကိုယ်ဒီနေရာလေးကို ရောက်လာတတ်တဲ့ အကြောင်းထဲမှာ ခုလို ကောင်းကင်တစ်ခွင်လုံး မိုးတိမ်တွေအုပ်ဆိုင်းကာ ညိုမှိုင်းနေခြင်းလည်း တစ်ခုအပါအဝင်ပေါ့။ တကယ်ဆို အလင်းရောင်ဆိုတာ မြင် ကွင်းတွေကို ပိုမိုရှင်းလင်းစေတတ်တာ။ ဒါက သဘာဝ။ ဒါပေမယ့် ကိုယ်ဒီနေရာလေးကိုရောက်မှ ဒီသဘာဝက နေရာတိုင်းအတွက် မသက်ရောက်ဘူးဆိုတာ သိလိုက်ရတယ်။
ကိုယ်ရပ်နေတဲ့ နေရလေးကနေ မြင်နေရတဲ့ မြင်ကွင်းကျယ်ကတော့ နေမသာပဲ တိမ်တွေဆိုင်းလို့ မှုန်မှိုင်းမှိုင်းရှိတတ်တဲ့ ခုလိုအခါမျိုးမှာမှ ပိုမိုကာ ပေါ်လွင်ထင်ရှားနေတတ်တယ်။ ကွင်းပြင်ကျယ်အဆုံး တဖက် တောင် ခြေက ဖြူလွလွ တိုက်အိမ်လေးများရဲ့ အလှ။ ဖြောင့်ဖြောင့်တန်းတန်း စီးဆင်းနေတဲ့ လူလုပ်မြစ်ငယ်တစ်စင်းနဲ့ အတူ၊ အရှေ့မှသည် အနောက်၊ အနောက်မှသည်အရှေ့၊ ဥဒဟိုပြေးလွှားနေတဲ့ အဝေးပြေးလမ်းမပေါ်က ရောင်စုံကားတွေနဲ့ပါ စိုပြေစိမ်းလန်းကာ သက်ဝင် လှုပ်ရှားနေတဲ့ ပန်းချီကားချပ်ကြီးပမာ။ မျှော် တွေး ငေး ဆွေး မဝနိုင်စွာ။ သဘာဝရဲ့ ဖိုးထိုက် ရတနာ။ ဒါက တောက်ပတဲ့ နေရောင် အောက်မှာ ရှာဖွေလို့ မရနိုင်တဲ့အရာပေါ့။
ကိုယ်ရပ်နေတဲ့နေရာက ကွင်းပြင်အလယ်က တောင်ကုန်းမြင့်မြင့်လေး တစ်ခုပေါ်မှာ။ တောင်ကုန်းလေးရဲ့ တဖက် အခြေမှာ တော့ နိုင်ငံအနောက်ဖျားကနေ မိုင်သုံးထောင်ဝေးကွာတဲ့ အရှေ့ဖျားအထိ တောက်လျောက်သွားနိုင်တဲ့ အဝေးပြေး လမ်းမကြီး။ ပင်ပမ်း ကြီးစွာ လဲလျောင်းနေတယ်။ နေ့ညမနား တသွားထဲသွားနေတတ်သူတွေရဲ့ ဝမ်းပြင်အောက်မှာ သူ့ခမျာ နားချိန်ဆိုတာ မရှိသလောက်ပါ ပဲ။ အခြားတဖက်မှာတော့ ဘယ်အရပ်ဆီကနေ စတင်စီးဆင်းလာမှန်း မသိရတဲ့ လူတွေဖန်တီး ထားတဲ့ မြစ်ငယ်တစ်ခုရှိတယ်။ တစ်နှစ် ပတ်လုံးစီးဆင်းနေတဲ့ ဒီမြစ်ငယ်ကို အမှီရတဲ့ ၁၂ ရာသီ စိုက်ပျိုးမှုကပဲ ကိုယ်မြင်ရတဲ့ စိမ်းလန်းခြင်းတွေ၊ လတ်ဆတ်ခြင်းတွေ၊ လန်းဆန်း ခြင်းတွေကို ရှင်သန်နေနိုင်တာ ဖြစ်မယ်ထင်တယ်။ တစ်ချိန်က ဒီဝန်းကျင် ဒေသဟာ ကန္တာရ ရပ်ဝန်းတစ်ခုလို့ မှတ်သားခဲ့ရဘူးတယ်။ လူ့စွမ်းအင်ဟာ ကန္တာရတွေကိုပင် မြစ်ပြင်တွေ ဖြစ်စေနိုင်သလို သစ်ပင်တွေဖြစ်အောင်လည်း ဖန်တီးနိုင်တယ်။ ချောက်တွေကိုလည်း ကူးလျှောက်နိုင်သလို တောင်တွေကိုလည်း ထွင်းဖောက်နိုင်တယ်၊ ဘယ်လောက်လှတဲ့ အစွမ်းအစလဲ၊ ဒါပေမယ့်လည့်း့့ ။
ကိုယ်မင်းကိုကြည့်နေတာ ကြာပြီ။ မင်းတခုခုကို ကြည့်နေတယ်ဆိုတာသိတယ်။ ဒါပေမယ့် မင်းကြည့်နေတာတွေဟာ မင်း မြင်နေရတဲ့အရာတွေ မဟုတ်ဘူးဆိုတာကိုတော့ ကိုယ်ကောင်းကောင်းနားလည်တယ်-တဲ့။ ရုတ်တရက် အနီးအနား ကပ်ပြောလိုက်တဲ့ အသံကြားရမှ ကိုယ့်ဘေးမှာ သူရောက်နေမှန်း သိလိုက်ရတယ်။ နောက်ပြီးသူကပဲ မင်းမှာ ဘာတွေများ လွမ်းစရာရှိသလဲ-တဲ့။ အော် ကိုယ့်အမေးကို မင်းမဖြေလည်းပဲ နေနိုင်တယ်နော်။ ကိုယ်က မင်းအတွေးတွေကို အနှောက် အယှက်ပေးရုံတင်မက မင်းကိုယ်ရေးကိုယ်တာဘဝကိုပါ စပ်စုနေသလိုမျိုး ဖြစ်နေပြီလို့လည်း သူက ဆက်ပြောသေးတယ်။
ကိုယ့်အဖို့တော့ ကိုယ့်စိတ်ကို တိတိကျကျ ဖတ်နိုင်သူတစ်ယောက်နဲ့ ရုတ်တရက်တွေ့လိုက်ရလို့ ပထမ အံ့သြသွားတယ်။ သူပြောတာဟုတ်တယ်။ ကိုယ်ကြည့်နေတဲ့အရာတွေဟာ ကိုယ်မြင်နေတဲ့အရာတွေ တကယ်မဟုတ်ဘူး။ ပိုပြီး တိတိကျကျ ပြောရလျင် ကိုယ်စိတ်ထဲပေါ်နေတဲ့ ပုံတွေဟာ ကိုယ့်မျက်စိက မြင်ရတဲ့အရာတွေ မဟုတ်ဘူး။ ကိုယ်တကယ်မြင်ခွင့် မရနိုင်ခဲ့တဲ့အရာတွေကို မြင်နေရ တဲ့အရာတွေနဲ့ အစားထိုးပြီး မြင်ခွင့်ရစေချင်လွန်းတဲ့ စိတ်ဓာတ်တွေနဲ့ ဒီနေရာလေးကို ကိုယ်ရောက်ရောက်လာတတ်တယ်ဆိုတာကို ကိုယ့်ကိုယ်ကိုယ် သိနေခဲ့တာ အတန်ကြာခဲ့ပြီ။ ဒါကို ကိုယ်ကလွဲပြီး ဘယ်သူမှ သိနိုင်မယ် မဟုတ်ဘူးလို့ ကိုယ်က ယူဆထားခဲ့တာ။
ကိုယ်ဒီနေရာလေးကို ရောက်ရောက်လာပြီး မကြာမကြာငေးမိတာကို စောင့်ကြည့်နေတတ်သူ တစ်ယောက်ရှိနေလိမ့်မယ် ဆိုတာ ကိုယ် ဘယ်လိုလုပ် တွေးထင်မိခဲ့မှာလဲ။
အထူးသဖြင့် မိုးတွေအုပ်ဆိုင်းနေတဲ့အခါမျိုးမှာ ခုလိုတောင်ကုန်းမြင့်မြင့်လေးပေါ်ကနေ ကွင်းပြင်ကျယ်ကြီးကို ငေး ကြည့် နေရတာကို သဘောကျလို့ ဒီနေရာလေးကို ကိုယ်တစ်ယောက်တည်း တိတ်တိတ်လေး လာနေလေ့ရှိတာ။ ကိုယ့်လိုပဲ ခုလို မိုးတွေညိုတဲ့ အခါတိုင်း ဒီနေရာကို တကူးတက လာနေတတ်သူတစ်ဦးလည်း ရှိနေတာကို သိရတော့ သူ့အကြောင်းကို ကိုယ်က စိတ်ဝင်စားမိတယ်။ ကိုယ်ဒီနေရာလေးကို လာနေတာ အကြောင်းရှိသလို သူ့မှာလည်း သူ့အကြောင်းနဲ့သူ ရှိမှာပဲရယ်လို့ ထင်မိတယ်။ ကိုယ့်အထင် တိတိကျကျ မှန်နိုင်လိမ့်မယ်ဆိုတာကိုလည်း သေချာသလို ခံစားမိတယ်။ ကိုယ့်အထင် မမှားခဲ့တာ အချိန်အနည်းငယ်အတွင်း သိလိုက်ရတယ်။ တကယ်တော့ အတွေးတူသူနှစ်ဦး အသိတူနေတတ်တာ ခံစားနားလည်ပုံတူနေတတ်တာက ဖြစ်နိုင်ခဲတဲ့အရာမျိုးမှ မဟုတ်တာ။ ။
No comments:
Post a Comment